فى ناس كانوا أصحاء نفسياً وعلى الفطرة.. لما نزلوا وتعاملوا مع الناس واتضحك عليهم وعاشوا مواقف صعبة، جالهم اكتئاب حاد وكره وخوف من التعامل مع الناس وصدمات نفسية عنيفة.. علشان كده لو داخل الحياة العملية قريب أو جديد..ركز فى الاتى :
..
- هتتعامل مع ناس أغبياء كثيراً..توقع ذلك..أغبياء بشكل غير متوقع.
- هتتعامل مع ناس بتوع ٣ ورقات ونصابين..دول كتير.
- هتتعامل مع ناس يودوك ويجبوك بالكلام..كلام بس.
- هتتعامل مع ناس بيسرقوا مجهود غيرهم وينسبوه لنفسهم.
- هتتعامل مع ناس عصافير..وهم عارفين إنهم عصافير.
- هتتعامل مع ناس مالهمش كلمة كثيرى الوعود ولا ينفذون.
- هتتعامل مع ناس ساذجين جدا وفاكرين إن السذاجة طيبة فيودوا اللى يتعامل معاهم فى مشكلة
- هتتعامل مع ناس كذابين كتييييير.
- هتتعامل مع ناس ماعندهمش شرف ولا أمانة وممكن يبيعوا أي حد مع أول موقف.
..
فانت تعمل إيه :
- لا تكن واحداً مما سبق فى تعاملك مع غيرك.
- حاول أن تتوقع ماسبق عند تعاملاتك.. حتى إذا حدث لا تصدم.
- لا تنخدع بالكلام.. أطلب أدلة..وقيم بالنتائج.
- الناس الكويسة تظهر فى التعامل المادي وعند الخلاف وعند تضارب المصالح.. أى حاجة تانية هيمثلوا إنهم كويسين.
- فى تعاملاتك..وثق كل حاجة وماتعتمدش على اتفاقات شفوية.
- ساعد الناس الطيبة اللى بجد محتاجين مساعدة لأنهم مظلومين في وسط هذه الغابة.
- خليك قوي وادي أي حد من السابق ذكرهم فوق دماغه وحجمه كلما كان في مقدرتك فعل ذلك.
- لا تثق فى أحد بسهولة.
- توكل على الله، اصلح نيتك، لا تظلم أحد.
..
الحفاظ على الصحة النفسية أصبح أمر يحتاج إلى تعلم وتدريب ومثابرة!